مش عارف اجيبهالك ازاي بس الماركيتينج بيتغير بسرعة رهيبة عن آخر 5 سنين ، و آخر 4 سنين و حتي من سنة فاتت.
انتشر في الكام سنة اللي فاتت مصطلح "Contextual Marketing" و ده اللي عرفه عراب الماركيتينج "فيليب كوتلر" Philip Kotler" في كتابه "Marketing 5.0" :
استخدام التكنولوجيا و الذكاء الاصطناعي التي تحاكي البشر لابتكار القيمة و ترويجها و إيصالها و تحسينها أثناء مراحل رحلة العميل.
بمعني تاني ابسط، هو استخدام الـ AI و التكنولوجيا المرتبطة بيه في التسويق لإضافة قيمة و فعالية لتحسين تجربة شراء العميل و تسهيل رحلته الشرائية Customer Journey.
طب علشان اسهل الموضوع اكتير خلينا نتكلم عن التطور اللي حصل في التسويق، لازم تعرف ان التسويق بيتطور باستمرار مرورا ب التسويق 1.0 اللي كان بيعتمد علي الانتاج، و التسويق 2.0 اللي بيركز علي العملاء بطريقة مباشرة، و التسويق 3.0 اللي بيعتمد علي الانسان و عواطفه و يمكن بيتعدى الموضوع ده و يصل الاشباع الروحي و المعنوي.
المفاهيم دي استغرقت تقريبا 70 سنة علشان تتطور علشان تنقل من التركيز علي الانتاج او المنتج إلي التركيز علي العميل، و عدى عليها عمليات كتير و تطور خلال السنوات الماضية زي مفهوم الشرائح و الاستهداف و مكانك في السوق (Segmentation - Targeting - Positioning) .
بعد كده وصلنا إلي التسويق 4.0 Marketing و اللي هو التحول من التسويق العادي إلي التسويق الرقمي في عام 2016، اللي بدأت في تغيير مفهوم التسويق التقليدي و نقله إلي وسائل التواصل الإجتماعي و قنوات الفيديو.
بعد كده ظهر مؤخراً مفهوم جديد في التسويق و هو الـ Contextual Marketing و ده اللي بيعتمد علي الذكاء الاصطناعي في تحسين الـ Customer Journey للعميل و ده لانه بيعتمد علي AI , و محاكاه اللغة الطبيعية او الـ NLP-Natural language processing و المستشعرات Sensors و الروبوت، و الواقع الافتراضي و المعزز VR & AR و انترنت الاشياء "IoT" و كل ده بدأنا نشوفه في بعض المنتجات و انتشاره اصبح سريعا في التسويق و حاليا في شركات بدأت تطبقه و تشتغل بيه.
علي سبيل المثال في سلسلة صيدليات مشهورة جدا في أمريكا اسمها Walgreens بدأت تستخدم الثلاجات الذكية، و دي عبارة عن شاشة عرض ذكية بتعرض المنتجات جواها، و ده ممكن يكون عادي، و لكن اللي مش عادي ان الشاشات دي فيها حساسات Sensors وكاميرات تقدر تميز الوجه Face Detection و تحدد عُمر الشخص و نوعه، و لما يقرب من الباب بتعرضله اكتر المنتجات المناسبة ليه و لعمره و نوعه. لا و كمان فيها مستشعرات بتتبع حركة العين و بعد ما حضرتك تختار المنتج و تفتح الثلاجة و تاخد المنتج بتاعك، هي بتعرضلك اكتر المنتجات المناسبة ليك بناءاً علي اختيارك.
كل ده بيكون معزز بالمعلومات الخارجية زي مثلا حالة الطقس و المنتجات الاكثر طلبا و مبيعا و غيرها و بياخدها الـ AI و يضرب كل ده في الخلاط و يعرض اكتر المنتجات الملائمة للشخص اللي واقف قدام الثلاجة.
مثال تاني:
السوشيال ميديا عموما بتستخدم الـ Contextual Marketing و ده واضح جدا انك لما بتكون بتدور علي حاجة في Google مثلا ممكن تلاقيها في الفيس بوك قدام عينيك فجأة، او ممكن تكون بتتكلم في التليفون او مع اصحابك علي الكافية و بعد ما تروح تلاقي الحاجة اللي كنتوا بتتكلموا فيها إعلانتها ظهرتلك في الفيس بوك او اي Platform تانية.
الخلاصة:
التسويق التقليدي تقدر تقوله خلاص "باي باي" و مرحبا بالـتسويق الجديد الـ Contextual Marketing، لان التكنولوجيا الجديدة دي هاتحسن تجربة شراء العميل Customer Experience، هاتساعدك في استهداف أحسن و تقدر تعرف الشريحة بتاعتك بتفكر في ايه و عايزة ايه حتي قبل ما تكون عندهم الحاجة لسة للشراء .
كل الشركات اللي مش هاتستغل التكنولوجيا و امكانيتها الرهيبة دي في تحسين منتجاتها او خدمتها و ازاي تروجلها هاتنتهي سريعا و تختفي .
إرسال تعليق