كتير مننا بيكتب محتوى جميل و منسق و بيجيب تفاعل ممتاز، و لكن بيكون مش عارف نوعية المحتوي اللي هو بيقدمه، هو مش عارف هو بيكتبه بالشكل ده ليه، و إيه الهدف منه؟!، و ازاي يطور آلية المحتوى بتاعه و يشتغل بطريقة بروفيشنال و يحقق نتائج أفضل.
ما هو المحتوى Hero, Hub ,& Hygiene
من فترة قصيرة مش كبيرة اوي (خمس سنين تقريبا) ، Google بدأت تصنف المحتوى اللي موجه للجمهور إلى فئات و ده علشان يكون سهل علي الCreators (خصوصا الفيديو كريتورز) انها تقدر تحدد اي نوع مناسب في الوقت المناسب. و اوضحت انها صنفت استراتيجية المحتوى إلى :
Hero - Hub -Hygiene
تقدر تشوف الموضوع من هنا : Schedule your content
المفهوم ده تم إعتماده و تقديمه علشان يساعد صانعي المحتوي علي YouTube و لكن صناع المحتوي استخدموه خارج النطاق ده، و بدأوا يستخدموه في كتابة المحتوي او صناعة المحتوي بالتحديد.
و الهدف منها هو صناعة محتوى باستخدام 3 طرق، كل طريقة لها استخدام و حافز لدي الجمهور علشان تساعد الجمهور انه يتابعك و تكون قادر علي انك تجذب جمهور جديد.
يعني ايه Hero Content؟
ده محتوي شيق، ممتع، مدهش، حاجة كده WoW، و في الغالب متكلف كتير جدا، و مش بيتحقق غير بتكلفة و تخطيط و تطوير كبير ، و في الشركات الكبيرة Big Business ممكن يكون كل شهر، و لكن في الغالب بيكون مرة أو مرتين في السنة.
مثال علي ده: الإعلانات اللي بتعملها شركات الاتصالات في رمضان او خلال السنة و تجيب فيها أشهر الممثلين او المطربين و بيتم عرض الإعلانات دي لفترة كبيرة ممكن توصل لشهر او اكتر ، زي مثلا إعلان فودافون لرمضان 2021
ده أكبر مثال للـ Hero Content محتوي بيتم مشاهدة و مشاركته ملايين من المرات فهو طريقة لعمل محتوي يعطي أكبر و احسن انطباع و تجديد الاتصال لدي العملاء الحاليين و كمان يستقطب عملاء جدد و يوضح قوة العلامة التجارية.
يعني ايه Hub Content ؟
ده اللي هو المحتوي العادي، اللي بتكتبه او بتصنعه بشكل دوري، سواء يوميا او أسبوعيا و ده بيكون العملاء بتوعك عارفين محتواك و بيعتبروه كمصدر او بيتم متابعته بشكل شبه يومي.
المحتوى من النوع ده بيكون مش مكلف زي الـ Hero Content، مجرد محتوى عالي الجودة فقط، جمهورك بيحب يتابعه، سواء منتج جديد او موضوع معين عن طبيعة عملك او خدماتك، و المحتوى ده بيكون لجمهورك اللي بيتابعك بالفعل.
المحتوي ده اللي بيخلي العملاء يفضلوا فاكرينك و بيحافظ علي علاقتك معاهم و ده بيركز علي العملاء الحاليين بوجه خاص و مش هدفه الاننتشار السريع زي الـ Hero Content، و لكن الحفاظ علي انك دائما في عقل جمهورك و تقدر تبني الثقة بينك و بينهم.
يعني ايه Hygiene Content؟
باختصار و سهولة هو المحتوي اللي غالبا بيبدأ بـ "كيفية عمل" او "How To". هو المحتوى اللي جمهورك بيدخل جوجل يدور عليه و يقوم بعمليات بحث علشان يوصله، محتوى بيهدف لتعليم جمهورك حاجة هما بيدوروا عليها، و هنا انت بتصنع محتوى Hygiene، زي مثلا الفييديوهات الخاصة 5min Craft.
المحتوى ده بيكون بشكل متكرر اكتر من Hub Content و ممكن يكون بشكل يومي "لو تقدر تعمل كده" لانه بيحقق استفادة و ثقة من جمهورك ليك و لخدمتك، فهو بيجذب جمهور جديد او بيدور علي إجابات لأسأله هو مش عارف حلها.
المقالات و المواضيع اللي علي البلوج دي اكبر مثال علي الـ Hygiene Content، لان انا بستهدف الجمهور اللي مهتم بالتسويق و كتابة و صناعة المحتوي، اللي في الغالب بيدوروا علي إجابة لسؤال معين و بدليل انك بتقرأ الموضوع ده الوقتي، و كمان اني ممكن اكون عملاء محتلملين في المستقبل.
بما ان الاستراتيجية الأصلية للـ Hero - Hub -Hygiene كانت أصلا من جوجل و تم إنشائها خصيصاً لصانعي المحتوى علي YouTube و بتخدم محتوي صغير نسبيا، فهناك نظرية مماثله لها و هي : Pow, Push, Pull. اللي بتخدم في الاساس المحتوى الأكبر زي الـ Content للمواقع و البلوج و السوشيال ميديا Social Media.
خليك فاكر
Hero، Hub، Hygiene طريقة لتقسيم أتواع المحتوى اللي من خلاله هاتقدر تخدم بيها جمهورك بطرق محتلفة، الـ Hero هو محتوى (واو) بيجذب انتباه جمهورك و عاطفته و بيحفزه لمشاركته، و الـ Hub هو محتوى متوقع شبه اسبوعي و مجدول و جمهورك متوقعه منك، و الـ Hygiene هو المحتوى الاكثر استخداما و بحثا و اللي من خلاله بتقدر تفيد جمهورك و تكسب ثقته.
كل ده ممكن مايشتغلش معاك كويس بس لو دخلت الـ Social Media معاه هاتبقي اصعب شوية، لان انت بتكتب بوستس تقريبا مرتين إلي ثلاثة في الاسبوع يعني مش Hub و في نفس الوقت هي مش How to او Hygiene .
يعني أعمل ايه يا استاذ غسان.!!!
هنا يجي دور الـ Module اللي بيقول Pow, Push, Pull، و هي أصلا بتكون داخل Hero، Hub، Hygiene، و بتكون كالتالي:
- Hero = Pow، و اللي هو المحتوى الضخم اللي انت بتكتبه او بتصنعه الهدف منه جذب اكبر عدد من الجمهور و المتابعين للمحتوي بتاعك.
- Hub = Push، و اللي هو علشان محتواك في جمهور بيتابعك و منتظر منك جديد و معلومات باستمرار.
- Hygiene = Pull، و اللي هي محتواها الجمهور بيدور عليه و بيستخدم البحث في الوصول إليه و بالتالي ممكن تجتذبهم علشان يكونوا جزء من جمهورك.
Pow, Push, Pull افضل حاجة للمحتوي الخاص بالـ Social Media اللي من خلاله بتقدر تعمل Push للجمهور بتاعك و حثه علي المتابعة او الشراء.
من خلال النظرية دي احنا هنا عندنا الـ Push و Pull علي نفس المتسوى، يعني لازم نعمل توازن بين الطريقتين بشكل كويس علشان نقدر نقدم اكتر محتوى مفيد للجمهور، و يظل ال POW في أعلى الهرم لانه اهمهم و هو اللي بياخد وقت و مجهود و مبالغ اكتر و بيجذب عدد متابعين جديد و بيحفز العاطفة عند الجمهور الحالي او الجديد.
الخلاصة:
اعرف الاستراتيجية اللي هاتشتغل عليها، لان ده هايساعدك تحقق اعلي نتائج بأقل مجهود، التخطيط و الجدولة من أهم شيء في صناعة المحتوى، ايوة انت بتعمل محتوى كويس بس لازم تفهم كل نوع بيشتغل علي إيه تجاه جمهورك علشان تعرف تستهدفه صح من خلال محتوي يحرك مشاعره او يزيد ولائه ليك او محتوى تعريفي بيك و بخدماتك و منتجاتك، او محتوى تثقيفي من خلاله جمهورك يثق فيك و تقدر تحوله بمنتهي السهولة .
إرسال تعليق