يعني ايه Inbound Marketing
معظمنا في بداية شغله في مجال Digital Marketing أكيد سمع المصطلح ده، و مش عارف معناه ايه و مش عارف يطبقه ازاي علشان يعرف "يتباهى" قدام ال Client بتاعه و يتكلم بلغة الماركيتينج.
المصطلح ده ظهر تقريبا عام 2009 و كان من ابتكار 2 جامدين اوي اسمهم Dharmesh Shah and Brian Halligan، ايوة بالظبط و هما اصحاب منصة Hubspot اشهر منصة بتقدم Digital Marketing Software & Tools.
الأخين دول عملوا كتاب اسمه:
"Inbound Marketing- Get found using Google, Social Media and blog"
و عرفوا يعني ايه Inbound Marketing و ازاي تستخدمة في استراتيجية التسويق بتاعتك.
تقدر تشتري الكتاب من هنا
كلمة "Inbound" دايما افتكرها بكلمة "Incoming" يعني "قدوم" او "قادم"، و هو ده بالظبط المعني للInbound Marketing.
هو ببساطه "علم كيفية جذب العميل إليك بدون اتباع الوسائل التقليدية المعتادة"
اصبر يا عم هنا، يا فرحتي ، هو انا فهمت الاولي علشان تقولي علم و حاجات ، انا علي الابيض مش فاهم.
بص يا سيدي، المصطلح ده يعني انك تجذب العميل ليك و هو اللي يجيلك بنفسه و يدور عليك انت تحديدا ، و التسويق بالطريقة دي بيعتمد علي انك تستخدم طرق مميزة علشان تجذب العميل بتاعك و تتواصل معاه و كمان يدخل معاك في حوار و نقاش و يبدأ يطلب منك انه يتعامل معاك بسبب انه خلاص بقي واثق فيك . و ده بالظبط هو عكس الطرق التقليدية التانية اللي معظم "الماركتيرز" شغالين بيها، اللي بتعتمد علي الإلحاح و "البرشطة" فوق دماغ العميل و الزن المتواصل علشان اخليه يشتري، يعني من الاخر انت بتعمل Pull مش Push للعميل.
طيب ما هو بردو انا مش عارف ازاي اجذب العميل، "يعني اعمل ايه يا استاذ غسان" ؟!
زي ما عنوان الكتاب موضح، اننا نستخدم الSocial Media و ال Blogs و SEO و تكون متواجد في كل مكان بيبحث فيه العميل المحتمل بتاعك. و مش موجود و خلاص "تؤتؤ" انت لازم يكون ليك محتوي جذاب و محفز للتفاعل و التواصل و علشان كده هاتلاقي انه ده مرتبط معاك بال "Content Strategy" و انا عن نفسي بعتبرها اهم حاجة في Inbound Marketing Strategy.
أبسطهالك!
تخيل انك بتسوق لبراند معينه او خدمة معينة مهما هي كانت ايه مهندس، دكتور، طيار، محل شنط حريمي، محل كشري ... الخ ، في دراسات بتؤكد ان علي الأقل 60% من الناس بيعملوا بحث اونلاين الاول قبل ما يقوموا بعملية الشراء، و هايعملوا بحث فين؟!! طبعا مالناش غيره "Google" طبعا، و ممكن شويه علي الشوشيال ميديا، يبقي انا سعادتك لازم اظهر للناس دي في الاماكن اللي بيدورا فيها علشان اشد انتباهم.
.. اللي هو ازاي؟ !
انك تقدم Content الناس فعلا بتدور عليه علي الانترنت ، و محتوي هنا اقصد بيه محتوي هادف و مفيد للزائر بتاعك مش غرضه البيع خالص، يعني شوية نصائح علي ارشادات، آراء عملاء قبل كده، محتوي يكون مُسلي و جذاب للناس و كل مجال و ليه المحتوي بتاعه اللي الناس بتدور عليه.
و زي ما قولنا قبل كده "Content is the King" كل ما المحتوي بتاعك كان احسن و افيد للناس كل ما الناس بدأت تدور عليك ، و يوصل الامر كمان انهم يدخلوا يسألوك عن رأيك او استشارة او نصايحك، و هنا بتكون عملت احلي Inbound Marketing.
مثلا زي ما انت بتقرأ البلوج دي الوقتي، اللي هدفها اني اقدملك معلومة تستفيد بيها علشان لو وقعت في مشكلة او محتاج نصيحة فيما بعد تدخل تكلمني و ساعتها ممكن تطلب مني خدمات من اللي بقدمها.
كده فهمنا "بالبلدي" يعني ايه Inbound Marketing. تعالوا نشوف بقي نطبقه عمليا و علميا ازاي .
تعريف الInbound Markerting
Inbound is a method of attracting, engaging, and delighting people to grow a business that provides value and builds trust.Inbound marketing is a technique for drawing customers to products and services via content marketing, social media marketing, search engine optimization, and branding.
إيه هي خطوات الInbound Marketing ؟
في 4 خطوات رئيسية لازم تتبعها علشان تعمل Inbound Marketing Strategy ناجحة
Attract
يعني ازاي تحول شخص مايعرفكش و غريب إلي انه يكون زائر ليك و لموقعك او صفحتك الخ.
Convert
حول الزائر اللي جالك ده إلي عميل محتمل Lead
Close
يعني تحول العميل المحتمل ده إلي عميل فعلياً .
Delight
ازاي تخلي العميل بتاعك سعيد و مبسوط.
يعني كل هدفك في البداية انك تعمل محتوي قوي و جذاب للفئة المستهدفة بتاعتك سواء للموقع او وسائل التوصل الاجتماعي . و بعد كده ازاي احفز الناس دي انها تتواصل معايا و تتفاعل و يثقوا في البراند بتاعي لدرجة انه يدونا الإذن إننا نكلمهم و نتواصل معاهم و من هنا هاقدر اقدمله المنتج بمنتهي السهولة و باقل مجهود، و بعد كده لازم افضل متواصل مع العميل بعد الشراء علشان اقدم له خدمات اكتر و اكون قادر لاسعاده.
و هنا بقي هانتكلم عن استراتيجية مهمة جدا و هي Permission Marketing اللي ابتكرها العبقري Seth Godin و اللي بيخدمها بشكل اساسي الInbound Marketing.
عم "ثيث" قي كتابه قالك انك لازم تاخد اذن العميل قبل التواصل معاه بأي طريقة (ها!! واخد بالك ياللي هناك) ، يعني لو عرفت رقم تليفون العميل او ايميله ده لا يمكن ابدا بأي حال من الاحوال يعطيك الحق انك تدخل " تبرشط عليه" و ترميله الاعلان و تطلع تجري او تديله Cold Call مالهاش اي لازمة و تقوله ممكن اخد من وقتك دقيقة.
لازم تكون واخد اذن بده في الاول و كمان هاتكون بتقدمله فايده هو فعلا محتاجها.. طبعا كلنا فاهيمن ده.
الخطوات سهلة و واضحة و لكن الاهم هو ازاي هاتنفذ ده و تستمر فيه، لان كتير من الناس و الBrand بتبدأ بال Inbound Marketing و تنتهي بأنه عاوز يبيع و خلاص و ينسي هو كان ماشي ازاي و يشتغل علي Outbound Marketing
المميز في الاستراتيجيات دي انها قللت شوية من سيطرة نفوذ رأس المال لان زمان كان اللي معاه فلوس هو اللي بينجح، حاليا بقي الاهتمام بالعميل و خدمته و التواصل معاه و تقديم خدمة او محتوي مميز له من خلال وسائل التواصل او محركات البحث اهم و اكثر فاعليه .
في النهاية
الخطوات سهلة و بسيطة جدا و لكنها محتاجه مجهود و تكلفة و محتاجة اقتناع بأهميتها في البداية و الاستمرارية عليهاـ لانها استراتيجية بتظهر نتائجها بعد فترة بعيدة المدي.. صدقوني "اسأل مجرب"
في حوالينا كتير Brands بتشتغل بالمفهوم ده و بشكل ممتاز و هاتعرفوا ده بنفسكوا بعد لما عرفتوا ان اللي بيحصل حواليكم و معاكم مش صدفة و مش مقصود.
اتمني تقدروا تطبقوا الInbound Marketing صح في شغلكم و حياتكم بشكل عام.
إرسال تعليق