لان انت في Social Medial marketing Plan بتعمل خطة تسويقية شاملة فيها كل العناصر و التفاصيل علشان تدير السوشيال ميديا بتاعتك، و من غير خطة فانت "علي الله حكايتك"
اغلب العملاء اللي هاتشتغل معاهم مش هاتلاقي عندهم اي خطة مكتوبة ، و الخطة المكتوبة و الواضحة هي اللي هانقدر نقيس عليها الأداء غير كده تبقي"بلح" ، علشان زي ما اتفقنا قبل كده ان انت لازم تعمل أهداف و تكون SMART . وظيفتك بقي انت تجهز اسألة مهما كان عميلك مجاله ايه، و توصل انك تعرف اكبر قدر من المعلومات علشان تقدر توصل لطريقة تفكيره ، و من خلال الإجابات اللي هاتاخدها منه هاتحللها سواء مع نفسك او مع الفريق بتاعك و تديها من خبراتك التسويقية في ان انت تطلع للعميل بخطة استراتيجية للسوشيال ميديا بتاعته.
طيب ايه هي المعلومات اللي هاحتاج اعرفها؟
لازم تبدأ مع العميل بان انت مش عارف اي حاجة عنه و لا عن منتجه و لا سياستة في التسعير و لا منافسيه و لا حصته في السوق، انت من الآخر جاهل عن العميل و عن سوقه مهما كان معرفتك بالسلعة المقدمة ، لازم العميل اللي يتكلم و يحكي علشان تقدر تحط ايدك علي نقاط الـ Pain و تعرف تحلها.
خلي العميل هو اللي "سايق" هو اللي يحس انه هو اللي بيعلمك عن منتجه او خدمته، و ساعتها هاتطلع بأكبر كمية معلومات و يمكن في حاجات انت ماكنتش عارفها كمان، ده هايفيدك في تحديد الاهداف اللي العميل بتاعك عاوز يوصلها.
تاني .. يعني ايه المعلومات اللي لازم اعرفها ؟
بص يا سيدي ، من وجه نظري في اساسيات لازم تعرفها من العميل بتاعك و تطلع بيها بعد اول اجتماع ، علشان تقدر تعمله خطة تسويقية صح:
1- عن الشركة
يمعني اكتر حرفية: Company Profile و ده يندرج تحتيه حاجات زي (Vision, Mission, History, Goals) ، يعني لازم تسأل العميل عن اهدافه و احلامه و ارجوك ماتقاطعوش، سيبه يتكلم و يسترسل في الكلام لان بناءاً علي كلامه انت هاتعمل خطة ليها Goals و Objectives بتخدم الGoals دي . اعرف منه كل حاجة البداية و الفكرة و الهدف و شايف نفسه فين.
2- السوق Market
يعني لازم تعرف ك لحاجة عن السلعة او الخدمة اللي بيقدمها العميل بتاعك ، تاريخها، هدفها، نقط الـ Pain اللي بتحلها و المنافسين مين و السلعة دي او الخدمة موقفها ايه في السوق و الناس شايفاها ازاي.
3- العلامة التجارية Brand Name
لازم تعرف من عميلك موقف العلامة التجارية في السوق، يعني الجودة و السعر و المكانه فين و هل سهل الوصول إليه و لا لا. لازم تعرف كل حاجة عن البراند بتاعة عميلك منه هو شخصيا.
4- المنتج Product
النقطة دي اهم حاجة، لازم تعرف المنتج بتاع العميل بتاعك، كل تفصيله كل كبيرة و صغيرة، زي ما يكون شغال معاه، و يفضل لو شوفت ده بنفسك و شوفت خطوط الانتاج بتاعته و عرفت المنتج بيعدي بكام مرحلة.
5- السعر Pricing
لازم تعرف من العميل هو بيسعر منتجه ازاي و ايه هي سياسته، لان كل سوق و له طريقته مع العلم ان في اساسيات الكل بيتبعها، و تعرف ليه العميل بتاعك بيسعر بالطريقة دي ، و ده مهم جدا لان هايفرق معاك في الاستهداف Targeting.
6- المكان Place
يعني تعرف المنتج او الخدمة بتاعة العميل بتاعك بتخدم اي مكان ، لان مفيش سلعة بتخدم كل الطبقات و كل الأماكن إلا في سلع محدودة جدا ، و لكن لما تعرف الاماكن اللي عاوز العميل بتاعك ينتشر فيها هاتعرف تستهدفها اكتر و لو عملت اي Campaign هدفها الـAwarness تعرف تتسهدف المكان الصح اللي عميلك محتاج التوسع فيه.
7- المكان في ذهن العملاء Positioning
كل منتج و سلعة ليها ميزة تنافسية عن السلع الاخري، و إلا ماكنش يبقي في تنوع في السوق، و كله يبقي ماشي بالبركة و خلاص، فلازم تعرف ايه هي الميزة التنافسية اللي عند عميلك و مش عند المنافس ، و تستغل عليهاو دي اللي هاتحاول توصلها للجمهور. و لو ماعندوش ساعده في الخطة بتاعتك ان يكون له ميزة تنافسية يقدر بيها يعمل Penetration للسوق او الجمهور المستهدف.
8- طريقة الكلام Voice Tone
لازم تعرف منه هو عاوز يتكلم مع جمهوره ازاي بناءا علي تجاربه مع العملاء بتوعه، يعني يتكلم بطريقة رسمية Formal و لا بطريقة ودية Friendly و بردو من خلالك تقدر تساعده في اختيار نوع الـTone المناسب ليه بناءا علي الاحصائيات اللي انت عملتها.
9- المنافسين Competitors
هنا بقي لازم "تفصص" المنافس بتاع العميل بتاعك، و تعرف اسعاره و جودته، و مكانه و مميزاته و عيوبه بمنتهي الشفافية، و خليه هو اللي يتكلم عن منافس منافس بالتفصيل و افتح الموقع بتاعهم او الصفحات بتاعتهم و خليه هو اللي يتكلم لان في معلومات انت مش هاتعرف توصلها عميلك بس اللي عارفها.
نصائح مهمة:
- خد بالك في اول اجتماع (Brief) ده انت مستمع فقط، يعني سيب العميل يتكلم اديله اطول وقت ممكن يشرحلك مشاكله و هو عاوز ايه، خليه يتكلم 80% من الاجتماع و انت ال20% الباقيين. و ماتقلقش هاتاخد وقت في الكلام لما تخلص خطتك و تعرضها عليه.
- لازم تسجل الاجتماع سواء كتابة او تسجيل، و يفضل يكون في حد معاك وظيفته انه يكتب كل كلمة و كل تفصيله لان في الغالب ممكن تخرج من الـ Brief و في حاجات وقعت منك.
- لازم تجهز اكبر قدر من الأسئلة للعميل بتاعك علشان يجاوبك عليها، و اللي من خلال النقط اللي شرحناها دي تقدر تطلع من كل نقطة ب 7 او 8 اسئلة فرعية علشان تعرف توصل لكل المعلومات اللي انت محتاجها.
- احنا اتفقنا فوق ان انت "جاهل" بمنتج العميل، بس ده قدام العميل فقط، و لكن انت لازم تكون عامل سيرش قوي و عارف العميل بتاعك و منتجه و المنافسين بتوعه و ده هايساعدك انت تعرف تكمل معاه كلام و تفتح اسأله تانية و ممكن كمان يصححلك مفاهيم غلط.
إرسال تعليق