ازاي تقلل مصاريف إعلاناتك للنصف
غالبا مفيش حد فينا ما شافش الرسالة دي من الفيس بوك في الفترة الأخيرة : "Your cost per engagement may double"
من فترة الفيس بوك بدأ يطلع تحذيرات للمعلنين علي Facebook Business ، و بتحذرهم ان تكلفة الإعلان هاتبقي الضعف نظرا لعدة أسباب و بيتم ذكرها الملحوظة دي خلال مرحلة Ad Set "اللي بتحدد فيها ال Budget" و "Targeting" .
و مش لازم يطلعلك نفس الاسباب اللي في الصورة دي و لكن اهم اسباب هي :
- ان الاستهداف بتاعك قليل جدا ، يعني من 50الف إلي 100الف شخص
- ان الميزانية بتاعتك زيادة عن العادي بشكل "فشيخ"، يعني مثلا لو بتعمل إعلان ب 50 جنيه في اليوم و بعدين هبت منك و عملت إعلان ب300 جنيه في اليوم .
اول سبب بيكون علشان عدد الناس قليل بيخلي المنافسة كبيرة علي سعر إعلانك مع المعلنيين اللي بيعلنوا عن منتج شبه منتجك.
السبب التاني هو ان الفيس بوك بيحاول يوصلك لأحسن نتيجة بأقل سعر في المزاد "Auction" و لكن لما مش بيلاقي بيضطر انه ينقلك علي شريحة إعلى و بالتالي ال CPR- Cost Per Result او CPA- Cost Per Action بتكون أغلى و توصل لانها تكون الضعف، و ده ليه!! لان معاليك حددت ميزانية اعلي من العادي بتاعك علشان عاوز نتائج أكتر.
خد بالك انت ممكن تدخل في Auction مع نفسك، اه و الله زمبؤلك كده، لان الفيس بوك بيشوف الاعلانات اللي انت عملتها بردو في نفس الفترة و المجال و نتائجها و يعرف ان الاعلانات دي تكلفتها مثلا "50 جنيه" يوميا و حضرتك "رزعتله" 300 جنيه في وشه آل يعني مش همك المصاريف و لا الفلوس.
أعمل ايه علشان اقلل التكلفة؟
1- الاستهداف Targeting
دايما خلي استهداف الجمهور بتاعك Fair او "Broad نوعا ما"، ماتقلقش لان هو لو Broad بردو هاتوصل لنفس الناس اللي انت عاوزهم و لكن انت بتدي فرصة للفيس بوك انه يوصل لاكبر عدد من الناس ليها نفس الاهتمامات اللي انت بتحددها.
2- الميزانية
لو عاوز تزود الميزانية بلاش ترفعها مرة واحد و بفرق كبير ، يعني لو عاوز ترفع ل300 جنيه مثلا يوميا و انت اصلا شغال ب50 جنيه يوميا، يبقي ترفع ل 100 و بعدين 175 و بعدين 250 و بعدين 300 ، علي مدار اسابيع صدقني بتفرق كتير و بتجيب نتايج احسن.
3- الـ Learning Phase
مهمة جدا جدا جدا، في اول فترة الاعلان بعد ما يبقي Approved هاتلاقي في الAd Set الإعلان Learning و في المرحلة دي الفيس بوك بيدرس الاعلان و بيشوف تفاعل الجمهور اللي انت مستهدفة مع الإعلان و ممكن تلاقي مثلا تكلفة الإعلان عالية جدا و بتنزل و بتطلع لغاية لما الفيس بوك يكمل 50 optimized event علي الاقل (مثلاً 50 Engagement ) او (50 Click) حسب الهدف من الحملة بتاعتك. علشان كده بلاش تقفل الإعلان لو لاقيت التكلفة عالية في المرحلة دي ، غيره لو لاقيت ان التكلفة عالية بعد ما مرحلة Learning ما تخلص و يبقي الاعلان Active.
4- Ad Placement
في النقطة دي بالذات لو انت مش عارف انت عاوز اعلانك يظهر فين و ليه و هدفك ايه او لو الصفحة لسة جديدة او انت لسة بتجرب جمهورك يبقي سيبها علي Automatic Placement . اما لو انت ابو العريف و فاهم و خبير في الاعلانات ممكن تحدد Placement حسب رؤيتك، هاتقولي بتفرق ، هاقولك ايوة جدا ، في التكلفة و في التفاعل سواء هي اوتوامتيك او انت حددتها، حسب نوع و شكل الإعلان و المكان اللي جمهورك فيه او في المكان اللي جمهورك بيتفاعل اكتر من خلاله.
5- Campaign Budget Optimization
لو انت عامل اكتر من Ad Set جوه نفس الCampaign هتلاقي الOption ده موجود في بداية ال Campaign و يفضل انك تعمله Active لان الفيس بوك هايساعدك تصرف فلوسك علي احسن Ad Set جوه ال Campaign دي .
بس خلي بالك بنعمل دي في Campaign جواها Ad Sets لنفس البلد لان غير كده الفيس بوك هايخلي إعلانك يظهر في البلد الأرخص. يعني لو عامل مجموعتين واحدة في مصر و التانية في السعودية ، الميزانية كلها هاتتصرف في مصر.
اســـــــألـــــــــــة مهمـــــــة
- هل لو لاقيت رسالة التحذير دي ، اوقف الإعلان و لا اغيره؟
بص، مش لازم توقف الإعلان بس ممكن تكون الصفحة لسة جديدة و الفيس بوك لسة هايتعلم من إعلانك، و لو انت ماشي صح أصلا و بتصرف صح و حطيت ميزانية مظبوطة و الCreative بتاعك High Quality و الكCopy محترمة و بتحفز الجمهور و ظهرتلك الرسالة دي ممكن تتاجهلها و استمر و هاتعمل نتايج كويسة. (انا بقول ممكن) .
عن نفسي حصلتلي و ظهرتلي الرسالة دي و كملت و كان أعلى نتيجة و اقل تكلفة إعلان عملتها.
- هل المحتوي بيفرق؟
جدا جدا ، مع ان الفيس بوك قام بالغاء موضوع التكست انه لا يتعدي 20% علي الإعلانات و لكن مازال لها تأثير في تكلفة الإعلانات
ال Copywrite كمان بتفرق جدا، ان الناس تشوف المحتوي بتاعك و تحب تكمل قراءة و تتفاعل مع البوست ، من غير ما تعملهم اي Push اتكلمنا في الحتة دي في موضوع ال Inbound Marketing .
- مش عارف استهدف الجمهور بتاعي و مش عارفة ؟
مش مشكلة خالص و خصوصا لو الصفحة لسة في البداية، ممكن تحدد المكان و السن اللي انت مستهدفة و تحدد في الاهتمامات حاجة واحدة بس من اهتمامات جمهورك و تجرب و تشوف التفاعل .
- إيه هي المدة اللي اعرف من خلالها إعلاني شغال كويس و لا لأ ؟
علي الأقل 3 او 4 أيام ، لان في الفترة دي و حتي بعد ما فترة ال Learning بتخلص هاتلاقي التكلفة بتقل و بتزيد "حاجة بسيطة جدا" و كل ده لسة لافيس بوك بيشوف و بيتعلم يعرف مين جمهورك المستهدف.
- مش عارف ابدأ منين؟
ممكن تكلمنا و هانساعدك تحقق نتيجة كويسة من صفحة (اتصل بنا) او رسائل (فيس بوك)
إرسال تعليق