المزيج التسويقي او الـMarketing Mix هو أحد اهم عناصر التسويق، و يمكن هو اهم عنصر بتقوم عليه العملية التسويقية ككل بما في ذلك الخطة الاستراتيجية و الهدف التسويقي Marketing Goals & Objectives.
في الموضوع ده هانستعرض يعني ايه المزيج التسويقي و ايه هي أهدافه و أركانه اللي لازم علي كل ماركتير يكون عارفها كويس جدا اثناء وضع اي خطة او هدف.
المزيج التسويقي :
بيشير إلي مجموعة من الإجراءات او التيكتيكات اللي بتستخدمها الشركة للترويج لعلامتها التجارية او منتجها في السوق، و تشكل الـ 7Ps (كانو زمان 4 - و حاليا في نظريات بتشتغل ب9) مزيجا تسويقيا نموذجيا، و هانتكلم عنهم كل واحد بالتفصيل.
الـ 7Ps او السبعة P دول هما :
PRODUCT - PRICE - PROMOTION - PLACE - PEOPLE - PROCESS - PHYSICAL EVIDENCE
المنتج - السعر - العروض - المكان - الموظفين - العمليات - الدليل المادي
1- المنتج - Product
طبعا المنتج بتاعك لازم يكون موجود داخل كل عناصر المزيج التسويقي و لكن بشكل أساسي في نقطة المنتج، لازم تسأل و تجاوب علي كل الاسئلة المتعلقة بمنتجك، يعني ايه المشكلة اللي بيحلها منتجك للعميل؟ ليه منتجك هو الأفضل؟.
لما تواجهك صعوبة في بيع أكبر قدر انت عاوزه من منتجك او خدمتك فانت لازم تدور علي تطوير سواء المنتج او الطريقة نفسها اللي بتقدم بيها المنتج، ممكن تسأل نفسك سؤال، هل المنتج بتاعي او الخدمة اللي بقدمها مناسبة لعملائك اليوم؟ .
بالمقارنة مع منافسيك، هل منتجك او خدمتك بتتفوق بطريقة او بشيء مش موجود عندهم؟ ، هل لازم اعرض المنتج بنفس الطريقة؟
2- السعر - Price
السعر لازم دايما جيد مقابل المنتج، و مش لازم يكون انت ارخص سعر ، في ناس عندها الاستعداد تدفع اكتر مقابل انها تحصل علي خدمة او منتج بمميزات احسن.
لازم تكون متابع تطور الاسعار او الخدمات اللي انت بتبيعها تو بتقدمها للناس، مقارنة بالسوق و المنافسين، علشان تتأكد انها لسة في المنافسة في السوق الحالي، في بعض الاحيان ممكن تحتاج تنزل سعرك، او ترفع سعرك، يعني في شركات ممكن لو رفعت اسعارها تخسر عملاء كتير و شركات اخري لو خفضت اسعارها العميل سيشك في جودة المكونات او جودة الخدمة المقدمة. فعملية التسعير مش بتتم كده و خلاص و لكن طبقاً لمعايير و خطط استراتيجية بناءا علي السوق و التكلفة و العميل المستهدف و بتكون من خلال إدارات الشركة المعنية بالموضوع ده.
3- العروض Promotions
الإعلانات و العلاقات العامة و البيع الفردي و في الفترة اللي فاتت دخلت معانا "السوشيال ميديا" كلها ادوات اتصال رئيسية لشركتك مع العميل، لازم تستخدم الادوات دي في توسيل رسالتك "Vision" بالطريقة اللي هما عاوزين يسمعوها او يشوفوها بيها. سواء كانت مفيدة او جذابه لعواطفهم.
ممكن تغيرات بسيطة جدا تستخدمها في الترويج لمنتج تعمل معاك نتائج هائلةن ممكن تزود مبيعاتك و ممكن العكس انها تقللها، يعني مثلا تغيير العنوان الرئيسي للاعلان ممكن يزود نسبة المبيعات 500%.
الشركات الكبيرة و الصغيرة في كل صناعة بتعمل تجارب علي طرق مختلفة للإعلان عن منتجاتهاو خدماتها و الترويج ليها و بيعها، و خد القاعدة دي: مهما كانت طريقة التسويق و المبيعات اللي بتستخدمها النهاؤدة، هاتقف سواء عاجلا أو آجلاً، سواء لاسباب تعرفها او مش عارفها، و في كلتا الحالتين، هاتتوقف اساليب التسويق و المبيعات عن العمل في النهاية، و هايبقي لازم عليك تطوير اساليب مبيعات و تسويق و اعلان و عروض و استراتيجيات جديدة.
4- المكان - Place
يجب ان يكون منتجك او خدمتك متاحة علشان المستهلك يقدر يلاقيها بسرعة و بسهولة، مثلا زي التجارة الالكترونية او منافذ بيع منتشرة او متجر اونلاين او اوردر بالبريد او اي من خيارات التجارة الالكترونة.
المكان هو المكان اللي بتبيع فيه منتجاتك او خدمتك، لو مكانك بعيد او مش سهل الوصول إليه اعرف ان ان مبيعاتك ممكن تكون قليلة و هاتتأثر ، علي عكس لو مكانك متاح للناس و يقدر بسهولة يشتري منتجك او خدمتك.
الوسائل لكده كتير، ممكن مناديب المبيعات هي اللي بتزور العميل، او من خلال معارض ، او منافذ بيع، او الاتصال التليفوني، من خلال توزيع كتالوجات، ممكن تستخدم واحد او اكتر من الطرق دي حسب الانسب ليك و لمنتجك.
بس خد بالك ان اختيار المكان او الطريقة اللي هاتوصل بيها لعميلك لازم يكون بناءا علي دراسات لافضل الطرق اللي المستهلك بتاعك عاوز بيها منتجك، او مكان العميل بتاعك فين؟ ازاي يقدر المستهلك يشوف المنتج بتاعك او يعرف تفاصيل عنه؟.
5- الموظفين - الأفراد - People
اول ناس بتكون علي اتصال بالمستهلك او العميل هم الموظفين او مندوبي البيع، هما اللي بيتلقوا اي استفسارات او اوردرات او شكاوى من العملاء، من خلال التليفون او الشات او اي طريقة أخر، هما اللي بيتفاعلوا نع العميل و هما المفتاح الرئيسي لنجاح اي شركة لان الموظف ده هو وجه الشركة او المؤسسة، لازم يكونوا عارفين منتجات الشركة و خدماتها و كيفية استخدامها و ازاي يقدر يوصل للمعلومات ذات الصلة بالمنتج، ممكن في البداية تكون دي مشكلة لعدم الخبرة و لكن مع التدريب المناسب و التحفيز و التمكين من الشركة ممكن هما يوصلوا إلي ان يتميزوا في السوق من خلال علاقتهم الجيدة مع العملاء.
الموظف او مندوب البيع او اي فرد في المؤسسة له علاقة مباشرة مع العميل ده من أهم حاجة و لازم تختار الموظف الصح للمكان الصح، مش لازم يكون ذو خبرات عالية و لكن زي ما اتفقنا يكون عنده الامكانيات اللي تؤهله انه يكون واجهة الشركة و يقدر يتعامل مع العميل بتاعك صح و يجاوب علي كل استفساراته.
6- العمليات - Process
اتكلمنا قبل كده عن رحلة العميل و انه لازم يكون جرب تجربة شراء مميزة Buying Experience و يكون العميل راضي Customer Satisfaction ، و ده مش هايتحقق غير بوجود عمليات صحيحة في الكواليس، لان رحلة العميل من طلب الاستفسار و طلب المعلومات و بعدين عملية الشراء، لازم افكر في ان العميل يكون خاض تربة شرائية مريحة و ممتعة و نالت رضاه.
لازم افكر في العمليات اللي لازم اعملها او الخطوات لضمان حصول العميل علي تجربة إيجابية، علي سبيل المثال، لو العميل بيستفسر عن المنتج من خلال الشات ايه المدة اللي انتظرها العميل، ايه المدة اللي تاخدها بين طلب زيارة او طلب اجتماع و بين الاجتماع الفعلي، ايه اللي بيحصل بمجرد ما العميل يطلب؟، ازاي بتتم المراجعة علي مشتريات العميل؟، ازاي اقدر استخدم التكنولوجيا علشان العمليات دي تكون أكثر كفاءة. كل ده بياعدك انك تخلي العميل بتاعك يمر بتجربة شراء مرضية و ناجحة و يبدأ يتكلم عنك بشكل إيجابي Word Of Mouth.
7- الدليل المادي - Physical Evidence
بمعني بسيط هو اي نوع من انواع الدعاية الملموسة اللي بيحس بيها العميل، زي الكتالوجات،عينات، اشكال و تصميمات هندسية في ملف PDF .
الدليل المادي بيعتبر اشارة ملموسة لجودة المنتج اللي بتقدمه، ممكن يكون مفيد بشكل خاص لما يكون العميل ده اول مرة يشتري منك، لان ده بيشعره بالطمأنينة او ايه المتوقع من منتجك قبل تسليمه، زي مثلا مطعم الدليل المادي هنا بيكون شكل المكان الموظفين ، لبسهم، نظافتهم، قوائم الطعام.
الخلاصة:
المزيج التسويقي او 7Ps تم تسميته بالطريقة دي لان هي دي الطريقة اللي بيتم تطبيقها و تنفيذها و تنسيقها مع بعض ، و بالتالي بيضع الئكة او المؤسسة في مكان معين في ذهن العميل، و بيساعدك في التميز امام المنافسين من خلال عرض بيلبي احتياجات العملاء، و هو ده اصلا التسويق.
إرسال تعليق