5 خطوات علشان تعمل خطة تسويقية
مبدأيا خلنا متفقين ان كل نشاط او بيزنس له ظروفه الخاصة و الميزانية اللي ممكن يستغلها علشان يعمل خطة تسويقية أو حملات إعلانية. هنا نقدر نقول ان مفيش خطوط واضحة تمشي مع كل بيزنس او كل نشاط علشان تعرف تعمله خطة تسويقية، و لكن في بعض الخطوات الأساسية او العمليات الأساسية اللي تقدر من خلالها تعمل خطة تسويقية للنشاط بتاعك او العميل بتاعك.
الجمهور المستهدف:
لازم تكون عارف انت جمهورك مين، و مفيش حاجة اسمها كل الناس خالص لان في مقوله بتقول "استهدف الكل، تخسر الكل"، و ده ليه بقي، لأن كل شريحة من الجمهور لها تفكير معين و اهتمامات مختلفة.
علي سبيل المثال لو انت بتعلن عن عربيات او ساعات اصلية غالية هايبقي طريقة كلامك و استهدافك مختلف عن اذا كنت بتعلن عن اكسسوارات رخيصة.
بعد كده علشان تحدد الاهتمامات لازم تعرف الـ Buyer Persona دي بتفكر في ايه، و مهتم بإيه، يعني مثلا لو بتعلن عن العقارات هايبقي اهتمام الجمهور بتاعك مثلا "الساحل، ايفون، التكنولوجيا، الكومباوندز... الخ". و هكذا لازم تعرف الجمهور ده بيفكر في ايه و بيحب ايه و متواجد فين و مهتم بإيه و متعلم و لا مؤهل متوسط و متجوز و لا اعزب و هكذا.
دراسة المنافس
لازم تشوف المنافس بتاعك بيشتغل ازاي و بيتكلم ازاي "احنا مش هانخترع العجلة من الأول"، و قانوني و طبيعي تشوف المنافس بتاعك بيشتغل ازاي و تبدأ من مكان ما هو واقف.
لازم تتابع المنافس بتاعك و تشوف صفحاته و الموقع الالكتروني بتاعه و ازاي بيقوم بتسعير المنتجات و إيه هي المميزات و العيوب في المنتج بتاعه و هل ليه ميزة تنافسية و لا لأ و ايه هي ميزتك التنافسية اللي تخليك مميز عن اي منافس و تخلي العميل يشتري منك انت مش من المنافس.
الـ Inbound Marketing
اتكلمنا قبل كده في موضوع مفصل عن الـ Inbound Marketing و اللي باختصار بيهتم بإنك تضيف قيمه للمحتوى بتاعك اللي تقدر من خلاله تخلي العميل المستهدف بتاعك Targeted Audiance متابعك و واثق فيك لاأنك مش بتبيع بطريقة مباشرة.
يعني مثلا ممكن تقدم نصائح عامة عن حاجة مرتبطة بالمنتج بتاعك، يعني مثلا ممكن تكتب :
- كيف تحافظ علي .....
- 10 طرق تزيد من ......
- 5 حلول لمشاكل الـ......
و هكذا ...
من هنا انت بتسوق لنفسك بطريقة غير مباشرة من خلال تقديم قيمة حقيقة للعميل المستهدف بتاعك.
الإعلانات المدفوعة - Paid Ads
لازم نعرف ان في مرحلة الإعلانات لازم تقسم طريقة إعلانك و شكل و محتوي المنشورات إلي 3 مراحل اساسية و اللي هما
(Awareness - Consediration - Conversion)
Awareness - الوعي او التعريف
و دي مش بيكون غرضها البيع خالص، دي الغرض منها هو تعريف الناس بشركتك او منتجك او الخدمة اللي انت بتقدمها و تعرفهم انك موجود في السوق.
بالنسبة للميزانية فهي مالهاش اي قاعدة محددة، و لكن تعتمد علي حسب الامكانيات المادية بتاعتك.
Considiration - الاعتبار
و دي اللي هاتبدأ تعمل فيها إعلانات علشان الناس تتفاعل معاها و تسألك عن المنتج و تفاصيله و سعره و بردو في الغالب بيكون الهدف مش بيع بردو مباشر.
Conversion - التحويل
و الهدف من الإعلانات في المرحلة دي هو البيع بشكل مباشر و تحويل العملاء المحتملين لعملاء فعلا و هنا بيكون العميل عرفك خلاص في مرحلة الـ Awareness و عرف المنتج بتاعك و استفسر عنه و عرف المعلومات بتاعته من خلال الـ Consideration و هيابدأ يتحول لعميل من خلال ال Conversion.
الحملات اللي من النوع ده بتعتمد بشكل كبير علي موقع الكتروني Website و بتعمل حملات Catalog Sales و لو مفيش موقع ممكن تبقي حملة رسائل Messages.
الـ A/B Test مرحلة الاختبار
و دي اطول و اكتر مرحلة بتاخد وقت، اللي منها بتعمل اختبار للحملات بتاعتك من خلال الـ A/B Test اللي من خلالها بتجرب اكتر من شكل للإعلان و الكتابة و الاهتمامات و حتي الجمهور نفسه لغاية لما بتوصل لأحسن سعر علشان توصل للـ Buyer Persona بتاعتك و تحقق بيع.
معظم المواقع الوقتي زي الفيس بوك و انستجرام و جوجل فيهم الـ AB test
و بعد كده انت ممكن تعمل Custom Audience و LookAlike Audiance علشان فيما بعد تعيد الاستهداف تاني بعروض او بمنتجات مرتبطة للجمهور اللي اشتري منك بالفعل.
الخلاصة:
علشان تشتغل علي خطة تسويقية لازم تعرف انت هاتعلن لمين و فين و امته و ازاي اللي هي :
How - What - Why - Where - Who
ده هايساعدك انك تكون اقرب للنجاح بنسبة كبيرة علشان توفر علي نفسك و علي العميل بتاعك فرص ممكن تخسرها من غير التخطيط السليم.
لازم تجرب كتير و تعمل اختبارات كتير و تشوف المنافسين و مش عيب انك تقلدهم و تعمل زيهم في الحاجات اللي هما ناجحين فيها، و اكبر الشركات في العالم بتعمل كده، المهم يكون شغلك مختلف و بطريقة تجذب الجمهور بشكل احسن.
إرسال تعليق